رثـــــــاء غـــــــــــــــزة - للشاعر العراقي : عباس جيجان
" تمنينا أن نملك الملَكَة أو أن يشاركنا شاعر بشعر ، لكننا وجدنا في قصيدة الشاعر العراقي عباس جيجان خير معبر عن القضية "
آني أحب اللي يحبني
و اللي يفكر بالسلام كَبل ميمد إيدة لي مديت ادية
هذا قانون الفعل و الرد فعل
وهذا حق المكتسب من الحقوق المدنية
شماقصفتوا .. شماحركَتوا .. شماهجمتوا ..
غزة تبقى على العدو قلعة عصية
غزة دمعة فلسطين الـ بجّت الأمة الأبية
غزة عنوان المراجل .. غزة عنوان المراجل خبر عاجل
تنـقصف كل لحظة مية
غزة تدفع ثمن موقف لأن صارت للعرب تاج و هوية
غزة أم .. ادور على اطفالهة
تحت الأنقاض وما لكت منهم بقية
وإحنة أمة عربية كَمنه نتفرج عليهة
من شاشة التلفاز كلنه
وهيه تصرخ وي علية
أربع وعشرين ساعة تنقصف غزة الحبيبة
واحنة ع التلفاز نتسامر سوية
اندد .. نشجب .. ندين
الغاشم الجاب المنية
اندد .. نشجب .. ندين الاعتداء الغاشم الجاب المنية
لك ذولي مو مال تستنكر و تشجب .. تدين
ذولي مطلوبيلنه مليون دية
ذولي مو مال تستنكر و تشجب .. تدين
ذولي مطلوبيلنه مليون دية
ذولي الي يقاومهم يسمونه إرهابي
و الـ ما يقاوم يسطفل هوة و خية
لك ذولة ذبحونه َكبل ستين عام
واحنه لا زلنة ندور ع الحلول الدبلوماسية
ذول مال شبشب منهري و جداً قديم
و لولحة بكَصة وزيرة الخارجية
و هية هية شما بعد دنياك تفتر هية هية
إذا تزعل فتح ترضة حماس
وبالعكس تلكة الميول المذهبية
واحنة ما بين المطرقة و سندان يا عم ابتلينة
وما عرفنة .. و ما عرفنة الصدك وين ؟ ووين مفتاح القضية؟
والرعاة أصلاً رعاع .. من أجل كرسي الحكومة ، دمروا كل الرعية
مو أبو عمار التقى .. التقى برابين مرات ..
متى يلتقي عباس بهنية ؟؟؟
أجّل .. أجّل خلافك يا بن عمي
و كول جرح اللي نزف في غزة فية
أجّل خلافك يا بن عمي
و كول جرح اللي نزف في غزة فية
و هجمت إسرائيل تذبح بالأطفال و سوت بغزة إبادة بشرية
هذا هوة الهولوكوست ..
لك هذا هوه الهولوكوست سوته إسرئيل بينه
وغزة شاهد ع العصر يا هل الحمية
وين يا مجلس أمن؟؟ ولك وين يا مجلس أمن ؟؟
لا شريف و لا نزيه و لا تظل سافل النية
ليش بيد الظالم تحط السيوف؟؟
وتذبح المظلوم و تذبه بهبيّة؟؟
غزة آخر قلعة عدنة لا تظن تطيح لأولاد الحرام الأزعرية
غزة واجب على كل مسلم يدافع عنهة بيده
مو بكَلبة .. أضعف الإيمان ما حلة قضية
غزة واجب على كل مسلم يدافع عنهة بيده
مو بكَلبة .. أضعف الإيمان ما حلة قضية
حطين ردت عدنا بهاليوم ، وأول ناس نفزع من ترد القادسية
لا تظن غزة تموت احنة اهلهة
العربي حمال الحمية
لا تظن غزة تموت احنة اهلهة
العربي حمال الحمية
1 التعليقات:
هاي شللك بيهه. منوا منطيك فلوس عله غزة؟. يابه تطييير. انته رب الفلته .طفرت لمان عزل العراق. جاي تحجي عله غزة؟ العب غيرهه
إرسال تعليق